الحشريين !

الناس عايشه كدا، ومبسوطه كدا
عايزين تعكننوا عليهم عيشيتهم ليه؟
هو دا الاحساس اللي بيتكاثر عذريا في نافوخي كل يوم اكتر من اللي قبله
لما مثلا مثلا اكون راكب المترو، وأول ما نوصل المحطه الاخيرة
تلاقي الناس واقفه ادام الباب بتاع العربيه،
وشوشهم متجهمه ، وقلوبهم متحفزه، وعيونهم مفنجله
اول ما المترو يفتح
جري جري جري على السلالم
ويبخطوا في بعض، وناس تقع، وعيال تعيط
ذات مره ما قدرتش استحمل اللي بيحصل
فتكلمت بصوت عالي شويه وقولت
" ياجماعه بطلوا هبل، اللي بيطلع الاول مش بياخد حتة لحمه"
وكانت المفاجأه والطامة الكبرى
تلات تربع الناس اللي على السلم
بصولي باحتقار، وكأني انا شتمتهم
عايز نروح بيوتنا يا محترم،
واللي يقول عايزين ناكل لقمه مع العيال
وسمعت صوت واحده كده من تحت رجول الناس
ماعرفش كانت صاحيه ولا مغمى عليها بتقول
"اصلكم شباب فاضي، ومش حاسين بالمسؤليه ،ربنا يهديكم"
انا حسيت ان موقفي بقى وحش، والناس فهمت الموضوع غلط
فحاولت اصحح موقفي، واشرح الموضوع
انه مالهاش لازمه الزحام والجري بدل ماحد يحصله مشكله
وكانت الطامه الاكبر
الناس فاهمه صح وكل حاجه
بس هم مبسوطين كدا
واللي مش عاجبه:
"ابقى استنى لما الزحمه تخلص وبعدين ابقى اطلع يا توتو"
كانت هذه الجمله كفيله بغلق باب الكلام تماما
وجدت نفسي في النهايه
بدلا من انا بدعو لاقامة شكل من اشكال الرقي
والتقدم الاخلاقي والسلوكي_ اللي بالمناسبه مش عايز دكنور ولامهندس عشان يمارسه_
متهم بأن انا لا اعرف قيمة الوقت
وماعنديش احساس بالمسؤليه
لأ وتوتو كمان