يادي الكسوف !

اخوكم سافر فنلندا مره ،وكانت اول مرة اسافر وادخل مطار في حياتي ،المهم ركبنا من القاهرة الساعه 3 الفجر ،وصلنا امستردام الساعه8 صباحا،وهناك قعدنا ترانزيت للساعه 10 صباحا ،المهم: انا سألت عن المكان اللي هادخل منه للطيارة التانيه، اللي هاتاخدني الى فنلدا، وصلت عند البوابة، لقيت كرسي، قمت قاعد عليه وروحت في النوم ، وياريتني لا لقيت كرسي ولا روحت في النوم، انا فوقت على صوت الميكرفون بتاع المطار، بينادي اسم البوابة اللي انا هادخل منها للطيارة، قمت قايم جري ، وداخل على البوابة، لقيت جته ضخمه شبه بشريه مدججه بكل انواع الاسلحه البيضاء والسوداء ،ويحمل تقريبا كل انواع الطبنجات والرشاشات، وكذلك تحتوي سترته على حوالي 40 جهاز لاسلكي ، المهم انا شوفته من هنا قمت باصص الناحية التانيه، واستعذت بالله منه ومن شره ، اعتقادا مني انه احد الشياطين المارده ، لحد مالقيته بيكلمني انا ،ساعتها اتسمرت في مكاني، وهو عمال يرطن بنرفزه ، وانا مش فاهم حاجه ، انا عمال اقوله :عايز اركب الطيارة من هنا، واشاورله على الباسبور ، وهو يتنرفز اكتر ويزعق ، وانا مش فهم اي حاجه، لحد ما سألني ،(?can you speak English) قمت انا قايله (no) قام مشاور لي بايده على كرسي قريب ، وفهمت انه عايزني اقعد ، قعدت وانا مش عارف اعمل ايه .
افهمه ازاي ان الطيارة بتاعتي في البوابة دي ؟ طب الطيارة هاتستناني ولا لأ؟ وبقيت مرعوب ........
المهم شد انتباهي ، ان انا لوحدي اللي قاعد على البوابة دي ، بقيت بقول هو مافيش حد مسافر على الطيارة دي غيري؟ وقعدت ادور والف لحد مافهمت الموضوع .....
الموضوع ان في بنت صغيرة، الشرطه لقيتها عند البوابه دي ، ومش عارفين يوصلوا لأهلها، فقامو قافلين البوابة، ومغيرين مكان الطيارة للبوابه اللي جنبها ، لحد ما اهل البنت يجوا ياخدوها ، والراجل لما لأني عايز انزل من البوابه افتكر ان انا ابو البنت ، وانا طبعا ولا في البطاطا.
وعليها دخلت البوابة التانيه ، والناس جم خدوا بنتهم، وتوته توته خلصت الحدوته